Din is-Sena, Fejn Ħa Jitwieled Ġesù Bambin?

Bambin... iswed, abjad jew samrani? Ġesù kien Lhudi, allura aktarx li kellu karnaġġjon samrani, jixbah lil dak tagħna l-Maltin. Interesanti kif il-Bibbja ma tagħtix wisq importanza tad-dehra ta’ Ġesu’. Dan biex turi biċ-ċar li Ġesù ġie biex isalva lil kulħadd u biex kulħadd jinduna li d-dehra ta’ barra mhix kollox!
‘Do they know it’s Christmas time?' Din hija diska li tindaqq ħafna tul dawn iż-żminijiet u li naħseb għandha kliem sinifikanti ħafna. Kemm hawn nies li l-milied għalihom huwa ġurnata bħall-oħrajn, kollha vjolenza, inġustizzja u kull xorta ta’ tbatija oħra! Fejn hu Ġesu’ bambin fit-taqlib li hemm fl-Art Imqaddsa, post li ftit aktar minn elfejn sena ilu twieled Ġesù?
L-Afrika… In-nies imutu bħal għasfar tal-bejt b'marda qerrieda ta’ l-A.I.D.S, bil-ġuħ u bil-faqar. Il-milied iqattgħuh jaħdmu fis-sħana tax-xemx tiżreġ, biex forsi jkollhom x’jieklu għal dik il-lejla! X’milied għalihom!
Inħarsu lejn l-Awstralja... Hawn kieku issib ikel bir-rimi, imma għandhom tip ta' mewta oħra, dik ta’ ruħhom! Xalar u divertiment sfrenat, għawm u ‘sunbathing’. Dan hu l-milied għalihom. Tgħid hawnhekk hu l-post adattat fejn jitwieled Ġesu’ bambin?
U aħna l-Ewropej... Erħielna nżejnu d-djar u l-istabbilmenti aktar minn xahar qabel u ngħidu li ħa jitwieled fostna! Fuq skala iżgħar, ejjew naraw ftit x’jiġri f’pajjiżna, li fuq kollox nagħmlu parti mill-ewropa ukoll! Aħna 'l-Maltin minn dejjem kellna valuri msejsa fuq fidi soda, iżda sfortunatament qed nittieħdu mill-bqija ta’ l-ewropa! Għal grazzja t'Alla, Malta la għandna gwerrer u ħafna minna għandna saqaf fuq rasna u ngħixu komdi. B’danakollu ma nistgħux inkunu kuntenti billi nagħmlu l-bambini fit-twieqi biss! Jekk minagħalina li l-Milied hu dan, qejrin żballjati!
Irridu niftħu għajnejna biex naraw id-dmugħ sħun iċarar fuq ħaddejn omm, li tilfet lil binha f’dawn il-jiem, ta’ l-armla li qed trabbi lil uliedha waħedha. Nisimgħu il-karba tal-marid fl-isparijiet, u ħafna nies li qed jgħixu tbatija waħedhom fis-silenzju. Tbissima fuq fommna taf tbiddel ħajja ta' xi anzjan abbandunat minn familtu. Mela mmiddu idejna u nibdew naħdmu u ngħinu lil kulħadd. B’hekk Ġesù bambin ma jibqax f’dik l-istalla kiesħa ta’ Betlehem imma jitwieled fis-sħana tal-qalb ta’ kull bniedem!

Il-Ġid Materjali, Kif Iwassal Għal Ġid Spiritwali?

Computers, mobiles, ħwejjeġ… Qatt ħsibt li dawn l-affarijiet kollha għad jispiċċaw, bżonjużi kemm huma bżonnjużi, u importanti f'ħajjitna? Forsi ħafna jgħidu, kif nistgħu ngħaddu mingħajrhom. Dan huwa veru, għax illum l-materjaliżmu u t-teknoloġija daħlu f’kollox u kullimkien!

Allura wieħed jistaqsi, kif nistgħu nimxu fuq l-Evanġelju u ma norbtux qalbna mal-ġid ta’ l-art meta qiegħdin f’dinja fejn il-materjaliżmu jirrenja! Alla għamilna fuq il-ħolqien kollu biex nieħdu ħsiebu u nużaw moħħna biex naħdmu tajjeb l-art u l-ġid kollu li tana għal ġid tagħna u tal-proxxmu tagħna kollu. X’ġara tul dawn l-aħħar ħamsin sena?... Saru ħafna skoperti u avvanzi li sfortunatament issa qed iħallu impatt ħażin fuq l-umanita’ kollha!

Wieħed mill-efetti ħżiena hu dak li sirna soċjeta’ sekulari, voldieri l-mezzi tal-miedia u t-teknoloġija qed jinfluwenzawna tant li qed jiklulna l-valuri li trawwimna fihom matul iż-żmien. Huwa tajjeb li nużaw it-teknoloġija u affarijiet oħra li jistgħu jgħinuna nimxu 'il quddiem f’din il-ħajja, imma rridu noqogħdu attenti li ma nitilfux l-eternita’ ħabba f’ hekk! Ħafna drabi niġu ilsiera tal-ġid tagħna stess għax jibda jikmandana u jsir prijorita’ għalina bla ma nindunaw!

Biex npoġġi dan li qed ngħid fil-prattika ħa nġib ftit sitwazzjonijiet mll-ħajja ta’ kuljum fejn qed iseħħ dan. Ħafna kopji li jkunu qed jaħsbu biex jibdew familja jaħdmu mis-sbieħ il-jum sad-dlama tal-lejl sabiex ilaħħqu ma l-ispejjez tat-tieġ u tad-dar….. Id-dar tlestiet, il-koppja żżewġet imma wara lanqas sena qiegħdin fil-kawża għas-seperazjoni! Fil-maġġoranza tal-kasi jiġri li tkun inagħtat ħafna importanza lil affarijiet esterni bħad-dar, tieġ etc…. u l-affarijiet l-iktar importanti u interurji bħar-relazzjoni bejn il-kopja kif ukoll r-relazzjoni m’Alla, jkunu tkissru totalment. Jew inkella kemm hawn min ħadem u stinka imbgħad telaq f’qasir il-għomor u ħalla kollox warajh!

Jekk nagħtu ħarsa lejn iċ-ċimiterji nindunaw li l-ħajja ta’ din l-art tgħaddi bħal ħolma. Moħħna jrid jaħseb dejjem kif ħa jinqeda sewwa bil-ġid li jgħaddi biex nakwistaw il-ħajja ta’ dejjem. Fl-aħħar mill-aħħar Alla mhux ha jistaqsina kemm kellna affarijiet imma kemm għinna lil-proxxmu bl-affarijiet li kellna!

Il-Pożitivita’ F’Ħajjitna

Għal ħafna, speċjalment l-istudenti u l-għalliema, il-vaganzi tas-sajf waslu fi tmiemhom u għandhom quddiemhom sena skolastika ġdida. Iebsa biex wara sajf ta’ mistrieħ terġa’ tingrana għar-rutina tax-xogħol jew ta’ l-iskola imma ż-żmien ikompli għaddej u r-rota trid tibqa’ ddur!

Trinn trinn trinnn....! L-iżverjarin idoqq f’xi sitta ta’ fil-għodu, qum iġri iġri isa, għax il-ħin qed jiġri aktar minnek! Ix-xogħol jew l-iskola tasal bla nifs u nsomma tkompli sejjer hekk sakemm terġa tpoġġi rasek fuq l-imħadda! Xi dwejjaq ta’ ħajja, issir qisek robot dejjem l-istess! Ġurnata t’erbgħa u għoxrin siegħa mhux biżżejjed bl-affarijiet, li kollha kemm aħna, jkollna x’ nagħmlu. Ovvjament dan kollu joħloq stress żejjed li jista’ jwassal għal ħafna dwejjaq u tgergir.

Imma minjaf kieku konna noqogħdu f’post fqir! Minnflokk inqumu bl-iżverjarin, inqumu bill-ħoss ta' xi serduq jidden jew ta’ xi annimali oħra li jkunu viċin ta’ dik imsejħa dar fejn inkunu noqogħdu. Ma tlugħ ix-xemx it-tfal ikunu ġa qiegħdin fl-għalqa, jiġġerrew mat-toroq jew inkella jiġu sfruttati billi jaħdmu f’xi postijiet b’kundizzjonijiet mhux xierqa għalihom. Forsi l-eżempju tal-fqar mhux daqshekk reali, għax ġeneralment il-foqra narahom biss fuq it-telvision. Imma naħseb li kulħadd xi darba jew oħra mar l-isptar, hemm tidħol f’qoxortok speċjalment jekk tmur fis-swali tat-tfal. Ma tistax ma tħossokx ixxurtjata ħdejn dawn l-innoċenti, int li int b’saħħtek!

Dawn li semmejt huma ftit eżempji ta’ kemm aħna għandna nkunu grati għal dak kollu li għandna! Talli Alla qajjimna għal ġurnata ġdida ta’ skola jew ta’ xogħol, talli għandna dar fejn noqogħodu u ta’ ħafna affarijiet oħra li sfortunatament noħduhom for granted! Għandna naraw il-pożittiv f’kollox anke meta l-affarijiet ma jiġux kif irriduhom aħna. Niftakru f’min hu inqas ixxurtjat minna u li Alla jimxi id f'id magħna tul ħajjitna kollha, lest biex jgħinna.
LEARN TO LOOK AT THE BRIGHT SIDE OF LIFE!

It-Triq Lejn il-Konversjoni

F’ għeluq l-elfejn sena mit-twelied ta' l-Appostlu kbir San Pawl, il-knisja qed tfakkar dan l-avveniment mad-dinja kollha permess tas-sena Pawlina. Is-sena Pawlina bdiet fid-disgħa u għoxrin ta’ Ġunju u ħa tkompli għadejja matul din is-sena kollha.

L-iskop ta’ l-attivitajiet li qed isiru b’ konnesjoni ma' Missierna San Pawl, huwa biex in-nisrani isir jaf aktar dwar kif għex u kif jista’ jimita lil dan il-qaddis tant ħabbrieki biex iwassal il-kelma t’Alla lil ġnus. San Pawl kien ċittadin Ruman u kien miġnun biex jippratika ir-reliġjon Lhudija fl-irqaqat kollha tagħha. Baqa’ sejjer hekk sakemm darba bħas-soltu kien sejjer biex jippersegwita l-Insara. Kien propju fit-triq għal Damasku meta l-Mulej sejjaħ lil Pawlu. Minn hemm il-quddiem saret bidla radikali f’Pawlu. Min-naħa tiegħu Pawlu ma setax jagħmel dak li Alla ried minnu mingħajr ma jaf min hu. Interssanti it-tweġiba li tah Ġesù: ‘Jien Hu dak li int qiegħed tippersegwita’. Tweġiba qasira għal bniedem li kien sema’ b’Ġesù bla ma qatt qabel skopra min hu verament imma kienet biżżejjed biex jibda jifhem min hu Ġesù. Minn hemm imbgħad mar għand Hannanija fejn hemmhekk tgħammed u beda jitgħallem l-iskrittura.

Peress li Pawlu ma kienx wieħed mit-tnax l’appostlu lil Ġesù ma sarx jafu meta kien għadu f’din id-dinja imma sar jafu wara li qawmien mill-mewt tiegħu. Fl-ittri jgħid li Ġesù nnifsu kien jidirhlu u b’hekk sar jaf x’gara meta Ġesù kien għadu magħhom f’din id-dinja. Pawlu ikkonverta l-ewwel pagani fil-Knisja u għallem kemm felaħ l-Evanġelu għax kien ċert u jemmen li dak li kien qed jgħallem kien kollu verità. Minkejja li għadda minn ħafna tbatija xorta baqa’ jxandar l-Evanġelu sa l-aħħar mumenti ta’ ħajtu. Seta’ jagħmel dan għax baqa’ jżomm sħiħ f’dak li jemmen u kien żgur li Alla kien dejjem miegħu.

It-triq tal-konversjoni m’hiex waħda faċli u trid tkun ippreparat għal ħafna ostakli u tbatija pero’ bl-għajnuna t’Alla jirnexxilna negħlbuhom kollha. M’għandniex naqtgħu qalbna milli nsiru qaddisin għax Alla jsejjaħ lil kulħadd, kif rajna mill-ħajja ta’ Missierna San Pawl jiddependi biss minna, nisimawhx jew le!

Il-Baħar - Dinja oħra li rridu nieħdu ħsieba

Bħalissa n-nies tistħajjilhom serbut nemel fuq il-bajjiet bil-kwantita’ li jkun hemm. Tinħass differenza kbira bejn tara bajja fix-xitwa u tara l-istess xtajta fis-sajf. B’kuntrast mas-sajf, fix-xitwa l-bajjiet ikunu bla ħajja, ma tarax ruħ, tinduna li kien hemm xi ħadd jekk tirfes xi siringa!
F’dan iż-żmien il-bajjiet ikunu miżgħuda bil-barbques li jsiru, bin-nies jgħumu il-ġurnata kollha u sfortunament bil-ħmieġ li jħallu warajhom ċerti nies irresponsabli! Ħafna drabi nismgħu ħafna fuq li għandna nħallu l-bajja nadifa għal min jiġi warajna imma l-baħar ftit li xejn nagħtu kasu.

Ninsew li l-bahar jagħmel parti mill-bajja ukoll. Huwa d-dar ta’ ħafna speċi ta’ ħut għalhekk il-baħar huwa dinja oħra li rridu nieħdu ħsiebha. L-egoiżmu li sar għandna ha jispiċċa biex fl-aħħar mill-aħħar joqtol lilna l-bnedmin fil-veru sens tal- kelma! L-aqwa li nieħdu gost u ninqdew aħna u ma jimpurtana minn xejn aktar. Kemm il-darba qabadna bżonn naturali u ma ħabbilna rasna xejn u għamilna fil-baħar? Hu dmirna li naraw li nżommu l-baħar nadif kemm għalina nfusna u kif ukoll għall-ħlejjaq li jgħixu fih.

Fenominu ieħor li sena wara sena jerġa jitfaċċa huwa n-numru kbir ta bram li jidħol mal-kurrent fi xtutna. Dan huwa ta detriment kbir prinċipalment għal żewġ raġunijiet. It-turismu jieħu spinta ‘il quddiem f’dan il-perjodu minħabba x-xemx u l-baħar. L-ekonomija tieħu daqqa l-isfel jekk it-turisti jonqsu ħabba dan il-fatt. Forsi ma jimpurtanix mit-turismu għax ma jolqotnix direttament, imma naħseb ħadd ma jieħu gost tigdmu xi brama u jitlef il-gost kollu li jkum qed jieħu! Minħabba n-nuqqas ta qarnit li inqabad u għadu jinqabad biex nissodisfaw ruħna aħna m’għadx baqa’ min jiekol il-bram b’riżultat li qed jaffettwa lilna ilkoll.

Il-baħar qiegħed hemm biex ngawduh pero’ noqogħdu attenti li ma neqirduhx bl-istess gost tagħna. Għandna d-dmir li nieħdu ħsieb tal-ħlejjaq li jgħixu fih u nippreservaw għal ġenerazjoni ta warajna.

Jum Dinji taż-Żgħażagħ - 2008

“Intom ikollkom il-qawwa, meta jiġi l-Ispirtu s-Santu fuqkom, u tkunu xhud tiegħi” (Atti 1:8).
Din hija t-tema tal-jum dinji taż-żgħażagħ għal din is-sena li qed isir bħalissa f’Sydney, l-Awstralja.

Żgħażagħ minn kull pajjiż jinġabru flimkien minkejja d-differenzi fil-kulturi u l-lingwi fost l-oħrajn, b’għan wieħed komuni, dak li jimxu warajH! L-Awstralja huwa pajjiż enormi, minkejja dan, iż-żerriegħa tal-fidi naqset drastikament u m’għadiex tinżera biex titkattar u tikber mal-pajjiż kollu. Dan hu l-għan li ġie magħżul dan il-pajjiż, biex bl-enerġija u l-ħeġġa taż-żgħażagħ li ħa jitilgħu għal din l-esperjenza ferm sabiħa jsaqqu l-fidi dgħajfa ta’ min għadu jemmen, kif ukoll jiżirgħuha f’min ma jemminx.

Huwa mod sabiħ kif kulħadd ħa jirċievi u jagħti fl-istess ħin. Min ħa jmur hemm biex jagħti xhieda ta’ dak li jemmen fih zgur ħa jissaħħaħ u jimtela’ bil-qawwa x’ħin jara dawk in-nies kollha bl-istess fehma tiegħu u allura jinduna li mhuwiex waħdu li qed jipprova jgħix ta’ nisrani fid-dinja tal-lum. Fl-istess waqt, dawk li huma bierdin jew m’għandhomx fidi, jitqanqlu mill-ħeġġa u l-eżempju ta’ dawn iż-żgħażagħ biex huma ukoll iħossuH li qed jħabbtilhom u jistenniehom jiftħulu l-bieb ta’ qalbhom.

Huwa vera li jekk tmur Sydney ħa tħossok iktar parti minn din l-attivita’ u tidħol aktar fl-ispirtu permezz tal-‘workshops’ li jiġu organizzati matul il-jum, kif ukoll bis-‘shows’ ta’ kull filgħaxija. Iżda min ħa jibqa’ f’pajjiżu, xorta jista’ jduq it-togħma żgħira ta’ x’ħa jseħħ f’Sydney, anke għal fatt li il-ftuħ tal-‘world youth day’ ħa jintwera fuq it-televixin. Ħa ssir attivita’ f’ KennedyGrove fejn l-quddiesa u ċ-ċelebrażżjonijiet li ser isiru, nistghu narawhom flimkien, b’xandira diretta minn Sydney fuq ‘big screen’. Din ħa tkun ta’ għajnuna, biex għalkemm fiżikament ħa nkunu mili l-bogħod, fl-ispirtu ħa nkunu magħqudin ma’ dawk preżenti f’Sydney.

Il-mesaġġ li ħa jingħata mill-Papa Benedittu f’dawn il-jiem hu għaż-żgħażagħ tad-dinja kollha. Għalhekk kulħadd mħeġġeġ jgħaddi dak li għandu x’joffri hu lil ħaddieħor. F’idejk biex tgħaddi dan il-mesaġġ lil min taf, ħalli nkunu xhieda tiegħU kulimkien. PAY IT FORWARD!

Il-Festa ta’ Corpus

F’dan iż-żmien uħud mit-tfal agħmlu l-ewwel tqarbina. U int? Qed tilqgħu bl-istess ferħ li ilqajtu fl-ewwel tqarbina? Qed tħallih ikun ikel ta’ sustanza ghar-ruħ ta’ kuljum? Fuq kollox qed issir ħaġa waħda miegħU fl-Ewkarsitija, tant li qed tinbidel fiH? B’hekk id-dinja temmen f’Alla u l-kelma tiegħU tasal sa truf l-art kollha!

Biex iseħħ dan, in-nisrani jrid jara li ma jitlifx l-ebda okkażjoni milli jirċievi l-Ewkaristija. L-Ewkaristija hija l-ħajja tan-nisrani, mingħajrha ikun qisu karozza bla petrol! Hija rigal m’għand Alla lejn il-bniedem biex jibqa’ miegħU sa l-aħħar taż-żmien. Għax kif jgħid Alla stess fit-testment il-qadim ‘l-għaxqa tiegħi hi li nkun ma ulied il-bnedmin.’ Dan imbgħad ikompli jissaħħaħ fit-testment il-ġdid meta bagħat lil ibnu fid-dinja biex jibqa’ sagrifiċċju għal dejjem tal-patt il-ġdid għas-saħħa tagħna l-bnedmin.
Min-naħa tagħna għandna nkunu rikknoxenti ħafna għax hawn għandna rrevelat kemm hi kbira l-imħabba t’Alla għal bniedem. Hu iċċeken u ried jinħeba fl-ostja pero’ jibqa’ preżenti realment biex b’hekk jidher permezz ta’ min jirċevih. Meta nieħdu minn dan il-ħobż tas-sema jkollna l-qawwa biex negħlbu t-tentazzjonijiet li niltaqgħu magħhom ta’ kuljum u ngħixu skond ir-rieda t’Alla għax ikollna l-grazzja tiegħU fina.

Corpus hi l-festa tal-ġisem u d-demm ta’ Kristu li għadha tiġi ċċelebrata aktarx xi ġimgħa wara l-ewwel tqarbina. L-iskop tal-purċissjoni fit-toroq hi li s-sagrament joħroġ barra mill-bibien tal-knisja għax in-nisrani jrid jgħix l-Ewkaristija kulimkien. Ġesù jrid jibqa’ ħaj fid-dinja permezz ta’ min jilqgħu b’qalb miftuħa beraħ, lest biex jagħti xhieda tal-veru ferħ u paċi li jnissel fik biss Ġesù Ewkaristija qalb dan il-ħafna imrar li hawn madwarna. Ta min jgħid li Corpus ma tiġix darba fis-sena biss imma kuljum kull fejn issir quddiesa.

Nirreflettu ftit mela jekk l-Ewkaristija hux tħalli l-frott meħtieġ u nitolbu biex tkun għalina l-ferħ u l-hena tul ħajjitna fuq din l-art.

Tiġdid

Ma l-istaġun tar-rebbiegħa kollox jerġa jibda jieħu l-ħajja. S-siġar jilbsu l-weraq, il-fjuri jiftħu b'qawsalla ta' kuluri, il-ġranet jitwalu u t-temp jisbieħ. Qisu kollox jerġa jqum għal ħajja ġdida u jkun lest biex jiġġedded u jkattar.

Tajjeb kieku nieħdu spunt minn dan u naraw jekk aħna l-insara ngħixu l-Għid u niġġeddu kuljum. Ftit aktar minn xahar ilu ċċellebrajna l-Għid, l-akbar festa tagħna l-insara. Dan għax nħlisna mill-irbit tad-dnub u ngħatalna lura d-don tal-ħajja fil-milja kollha tagħha. Dan ifisser li aħna maħluqin biex ngħix mhux biex mmutu!

Ħafna drabi peress li kollox jagħddi malajr inkluz l-għid ninsew, li għalkemm t-tifkira veru għaddiet imma d-don tal-ħajja għadu jingħata kuljum! Kemm qieghed nieklu ta' kuljum mill-ħobż li jagħti l-ħajja? Ġesù jtina ġismu u demmu ta' kuljum biex niġġeddu aħna u nġeddu lil oħrajn għax inwasslulhom lil Ġesù permezz tagħna. Hawn diversi nies li għalkemm huma ħajjin, huma mejtin, għax m'għandhomx l-ispirtu tal-ħajja fihom. Iħossu ċertu vojt fihom li ma jkun jista jimtela b'xejn. Din s-sitwazzjoni jesperjenzha kulħadd imma l-aktar iż-żgħażagħ u l-anzjani. Minn naħa taż-żgħżagħ ikunu għadhom bħal fjuri qed jiftħu. Dawn ikunu għadhom iridu jiskopru x'se toffrilhom il-ħajja. Id-dinja tal-lum qed turina llużjoni fix-xalar sfrenat għax naħsbu li l-ferħ ħa nsibuh f'affarijiet bħal dawn. Imsieken iż-żgħżagħ l-iktar dawk dgħajfa li jinqabdu fix-xbiek għarrieq ta' xi vizzju biex mingħalihom isibu l-kuntentizza. Mix-xaqliba l-oħra, l-anzjani ukoll iħossu dan il-vojt. Minħabba li jispiċċaw waħidhom u mwarrba wara li jkunu rabbew il-familja b'tant imħabba u għożża.

Irridnu nkunu aħna li ngħinuhom u nuruhom li l-ferħ u t-tama jiġu minn ġewwa u mhux minn barra. Minn ġo dik il-bejta ta' ġo fina, li mixħutha fiha għandha żerriegħa ta' imħabba li ma tmut qatt! L-imħabba li tiġi mill-qalb u l-ispirtu, li tefgħahom Alla, b'hekk meta jkun kollox dlam madwarna, ma mmutux.

Dan ix-xahar niċċelebraw ukoll Jum l-Omm. Nuru l-gratitudni u l-imħabba li jistħoqqilha lil ommna ta' din id-dinja li wellditna u taghtna l-ħajja, kif ukoll lejn ommna tas-sema li tagħtna lil binha u wellditna għall-ħajja ta' dejjem!

Is-Salib f'Ħajjitna

Il-bniedem għandu bżonn diversi armi biex jegħleb l-ostakli kollha li jiltaqa’ magħhom fil-ħajja ta’ kuljum. Il-ħajja tista’ titqabbel ma’ gwerra li trid titqabad mill-bidu sa l-aħħar biex toħroġ rebbieħ. Ġo dil-gwerra l-għedewwa huma l-qtiegħ il-qalb, il-biża u d-dubju fost ħafna l-oħrajn.

Jekk naraw biss l-affarijiet u t-tbatija bħalha kastig u kundanna faċli naqtgħu qalbna u ma nagħmlu xejn ħlief ingergru! Quddiem id-diffikultajiet li ngħaddu minnhom jiġuna diversi mistoqsijiet bħal għaliex jien? X’inhu l-iskop wara din it-tbatija kollha? Zgur li ma nsibux tweġiba għal dawn il-mistoqsijiet imma jekk naraw kollox b’għajnejn tal-fidi naslu biex it-tbatija ntuha sens. Niftakru li Ġesu’ qalilna ċar u tond “min irid jimxi warajja jiċħad lilu nnfisu, jerfa’ salibu kuljum u jimxi warajja”.

It-tbatija tista tissarraf f’ferħ jekk nafdaw għal kollox f’Alla. Bhal ma tarbija tiddependi għal kollox mill-ġenituri taghħa u ma tifhimix għax kultant tweġġa hekk ukoll aħna m’Alla. Aħna wisq ċkejnin u dgħajfa biex nifhmu għala jkollna ħafna drabi nweġġgħu u nbatu biex fl-aħħar mill-aħħar joħroġ il-ġid. Bħal f’pittura astratta li l-pittur biss jara l-preġju tagħha hekk ukoll Alla, li diġa għandu l-pjan ta’ ħajjitna lest imfassal quddiemu.

Kif għedt fil-bidu l-ħajja hija taqbida mill-bidu sat-tmiem. L-aqwa arma li biha wiehed jista’ jirbaħ hija l-fidi f’Ġesù Kristu. Hu tħaddan mas-salib biex wara li miet għadda għall-ħajja ta’ dejjem. Hu ġarrab it-tbatija u l-mewt bħalna, biex jurina li biex niksbu l-ħajja ta’ dejjem irridu ngħaddu mit-tbatija u mill-mewt tagħna nnfusna kif ukoll mill-mewt naturali!

L-Għid: Fidi, Tama, u Ħajja

Għall-insara din hi l-akbar festa u bir-raġun għax kieku ma kienetx għal din il-festa r-reliġjon tagħna ma tagħmilx sens. X’sens kien ikollha r-reliħjon nisranija kieku Ġesu’ miet u ma qamx mill-mewt? Assolutament xejn għax ma tistax temmen f’xi ħadd mejjet!

Mill-passjoni u l-qawmien ta’ Ġesu’ joħorġu tlett affarijiet li huma importanti ħafna fil-ħajja ta’ kuljum. L-ewwel u l-aktar ħaġa importanti hi l-fidi. Mingħajrha l-bniedem jħossu vojt u li din il-ħajja hija bla sens jekk wara l-mewt jispiċċa kollox. Ma jkollux inċentiv biex jagħmel xi ħaġa, iħossu waħdu u jħares lejn il-ħajja b’mod negattiv. Għall-grazzja t’Alla ngħixu f’pajjiż fejn il-fidi nisranija għadha tiġi pprattikata f’maġġoranza, iżda sfortunatament qed tonqos ukoll! Il-kawżi jistgħu jkunu diversi għala qed jiġri dan. Jista’ jkun li m’għadx jinħass il-bżonn t’Alla. Il-bniedem sar jfittex il-kuntentizza u affarijiet li jissodifawh fid-dinja li ħalaq hu stess għalih nnifsu. Xalar sfernat u l-kumdita’ żejda saru l-allat taż-żmienna! Fattur ieħor li qed jeqred il-fidi hu li dan ir-rigal tant prezzjuż sar tradizzjoni. Mhux jiġi mgħejjex u mkabbar fina imma qed jibqa’ dik iż-żerriegħa li tkun inżrat fina fil-magħmudija. Il-fidi trid tikber magħna, trid tisaqqa bil-kelma t’Alla u bis-sagramenti jekk jista’ jkun ta’ kuljum! Inkella ma nkunux nistgħu ngħadduha lil ta’ warajna għax ma nkunux ħadna ħsieb ta’ teżor mogħti lilna u nitilfuh għal dejjem!

It-tama hi ħolqa oħra marbuta mal-fidi. Għax nemmnu, għandna t-tama li wara din il-ħajja hemm tistenniena ħajja oħra. Għalhekk għandna naħdmu minn issa u ma naqtgħux qalbna nitqabbdu mat-tiġrib tal-ħajja għax nafu fi żgur li wara hemm tgawdija eterna!

Il-fidi u t-tama ġew meta Ġesu’ fetaħ idejH fuq is-salib u wriena li mħabbtu hija bla tmiem għalina l-bnedmin. B’dan il-mod reġa tana l-ħajja mill-ġdid. F’dan l-għid nerġgħu nistqarru l-wegħdiet tal-magħmudija u niġġeddu. B’hekk ngħixu ta’ vera insara u nemmnu li xi darba għad inkunu fil-ħenna pajjiżna!

Għadu jagħmel sens li nsumu waqt ir-radan?

Il-Karnival jiġi eżatt qabel r-randan biex dak li jkun jixxala u jiffanga kemm jiflaħ fil-prinjolati u l-perlini biex wara isum fir-randan. Il-karnival ilu jiġi ċċelebrat f’dan iż-żmien minn żmien il-kavalieri, mhux ta’ b’xejn li għandu din il-konnesjoni u t-tifisra marbutin mar-radan!

Ħafna drabi wara l-jiem tal-karnival jaqbduna d-dwejjaq għax nsibuha iebsa u difiċli biex nsumu. Ngħiduha kif inhi anke għal ġisimna jkun ta’ xokk meta jkun dera dejjem b’xi ħaġa fl-istonku, l-aktar wara li nkunu ilna nieklu u nixxalaw! Is-sawm u l-penitenza narawhom bħala affarijiet li rridu nagħmluhom bilfors f’dan iż-żmien. Ħafna drabi ukoll jiġri ili dan il-perjodu jintuża bħala opportunita’ tajba biex wieħed jagħmel id-dieta u b’hekk mingħalih li b’ġebla waħda jolqot żewġ għafasar għax ikun qed isum ukoll.

Nħoss li s-sens tas-sawm u s-sagrifiġġju ntielef mal-medda taż-żmien. Sfortunatament il-progress li sar illum il-ġurnata minnu nnifsu sar għalina rigress għax ħassrilna l-morali u l-valuri, u l-kelma sagrifiċċju ma ddoqqx tajjeb għal widnejna! Sagrifiċċju ma jfissirx tbatija, iżda l-missjoni li għandna kull wieħed u waħda minna rridu nweqttuha b’impenn u dedikazzjoni. Mhux faċli tgħix u tagħmel dak li int fi dmir li tagħmel ta’ kuljum. Imma jekk tgħaqqad ir-rieda tiegħek ma’ dik t’Alla zgur li tasal biex timxi mar-rieda tiegħu għalkemm din tirrekjedi daqxejn ta’ sagrifiċċju.

F’dan ir-randan tajjeb li nagħmlu ħilitna biex nagħmlu l-affarijiet żgħar ta’ kuljum mingħajr ma’ ngergru u mill-qalb. Niftakru kemm Ġesù bata tul ħajtu f’din id-dinja biex wettaq il-missjoni, allura aħna m’għandniex nibżgħu nagħmlu sagrifiċċji. Infatti l-Madonna fid-dehriet dejjem saħqet fuq s-sagrifiċċji u l-penitenzi. Dawn jgħinuna għal maħfra tad-dnubiet u tajjeb nagħmlu sagrifiċċji tul s-sena kollha għax nitgħallmu niċħdu lilna nnfusna u b’hekk jkollna l-ħajja ta’ dejjem.

Jannar… Nibdewh b’ħafna reżoluzzjonijiet u nispiċċawh...

Għall-grazzja t’Alla qed naraw it-tmiem ta’ sena oħra u bidu ta’ sena ġdida. Dan jfisser li għad baqalna x’nagħmlu u x’inbiddlu f’ħajjitna qabel ma jasal dak il-waqt li jsejħilna. Kien hemm ħafna nies li ma rawx din is-sena tiġi fi tmiemha, jew bdewha u issa qiegħdin ħdejĦ!

Għalhekk tajjeb li f’dan iż-żmien nirreflettu ftit dwar x’għadda mingħalina tul is-sena li għaddiet. L-esperjenzi sbieħ u l-mumenti ta’ ferħ li għaddejna minnhom, jagħmlulna kuraġġ biex nibdew din is-sena b’nota pożitiva, fil-waqt li dawk inqas sbieħ inħalluhom warajna u nipruvaw nibdew paġna ġdida. Wara naħsbu ftit x’nistgħu nagħmlu aħjar u x’nistgħu nirranġaw mis-sena li għaddiet. Hawn għandna bżonn l-għajnuna t’ Alla biex jgħinna ninżgħu l-bniedem il-qadim u nilbsu l-bniedem il-ġdid biex ninbidlu aħna u nbiddlu l-affarijiet li rridu nbiddlu.

Ħaġa oħra li jissemmew ħafna f’dawn il-ġranet huma l-imberkin reżoluzzjonijiet. Min ħa jibda d-dieta, min ħa jaqta’ xi vizzju u mitt elf reżoluzzjoni oħra, li ħafna drabi jinkisru l-għada ta’ l-ewwel tas-sena! Kollox nippruvaw nagħmlu reżoluzzjoni għax kollox idejjaqna, barra l-istil li drajna ngħixu fih, dak donnu ma jtiniex fastidju. Il-ħajja mgħaġġla ta’ llum nessietna kif nużaw il-ħin li għandna sew u x’inhuma l-veri prijoritajiet f’ħajjitna. Idea tajba kieku bħala reżoluzzjoni nippruvaw inbiddlu l-istil ta’ ħajja li drajna ngħixu fiha. Sirna qisna magni dejjem niġru wara l-ħin biex nlaħħqu ma’ kollox. Insejna li aħna bnedmin li rridu naħdmu biex nistrieħu u mhux nistrieħu biex naħdmu! Hemm bżonn nerġgħu nitgħallmu kif ngħixu u nħallu lil Alla jigwidalna ħajjitna, Hu li Hu d-dawl ta’ kull bniedem.

Ejjew nirringrazzjaw lil Alla tas-sena li għaddiet u nitolbuh biex matul din is-sena jżomm idejh fuqna ħalli f’kull ħaġa li ngħaddu minnha ngħarfuh u nibqgħu fil-grazzja tiegħu.