Il-Ħajja

‘Il-Mulej Alla sawwar il-bniedem mit-trab ta’ l-art u nefaħlu f’imnisejh nifs il-ħajja, u l-bniedem sar ħlejqa ħajja (Ġen 2:8). ‘U Alla ħalaq il-bniedem fuq xbihietu, fuq xbihat Alla ħalqu, raġel u mara ħalaqhom (Ġen 1:28). Mhux talli hekk talli Alla lill-bniedem poġġieh jaħkem fuq l-ħlejjaq l-oħrajn kollha!

Imma l-bniedem ma kienx kuntent b’dan kollu, ried li jsir daqs Alla. Għamel ta’ rasu u spiċċa jgħix f’dinja fejn il-ħażen jirrenja u l-mewt issaltan. Flok liberu l-bniedem sar ilsir tiegħu nnifsu u tal-ġid li jipposedi. Dejjem ifittex l-kuntentizza billi jkollu iktar poter u flus għax il-quċċata f’din id-dinja jilħaqha biss s-sinjur u min għandu s-setgħa li jmexxi. L-ironija tal-ħajja hi, li aktar mal-bniedem ikollu, aktar iħossu mdejjaq!

Bosta atturi u kantanti ta’ fama internazjonali għandhom flus kemm jesa’ ġidhom u tant kisbu popolarita’ li saru l-idoli ta’ ħafna nies. Madanakollu ħafna minnhom waqgħu f’xi vizzju bħad-droga u fil-fond ta’ qalbhom m’għandhomx kuntentizza u paċi. Hija ħasra li ħajjithom jarmuha u saħansitra ittemmuha kiesaħ u biered.

Aħna m’ aħniex bnedmin ta’ l-art biss, ma nistgħux naħsbu u naġixxu daqs li kieku wara din il-ħajja jispiċċa kollox! Ma rridux nħallu l-materjaliżmu joħnoqna, tant li nitilfu s-sens ta’ x’inhi verament l-ħajja! Alla hu l-awtur tal-ħajja u tana t-tama għal ħajja aħjar, meta Ibnu fetħilna mill-ġdid il-bieb tal-ġenna. Ejjew inkunu bnedmin li nħallu l-Ġesù jgħix f’qalbna, u b’hekk ikollna l-ħajja vera, li ġġib ferħ, paċi u kuntentizza fina nfusna u f’dawk li niltaqgħu magħhom.

L-Imħabba

L-imħabba x’inhi…? Mistoqsija magħmulha minn ħafna nies li ’mpossibli issib tweġiba waħda għaliha, għax kulħadd jesperjenzaha b’modi u f’waqtiet differenti tal-ħajja.

L-imħabba hija miżrugħha fil-qalb ta’ kull bniedem u tikber bil-mod. Din l-imħabba trid tissaqqa kontinwament, minn persuni li jaqsmu mal-oħrajn mill-istess imħabba li jkunu irċevew huma. Meta persuna dduq l-imħabba vera, ma tistax iżżommha għaliha, għax tħoss il-bżonn li taqsamha ma ħaddieħor. Din ix-xewqa li jkun maħbub u li jħobb qegħda fil-qalb ta’ kulħadd.

L-imħabba trid tinbena fis-sod u biż-żmien. Biex wieħed jasal li jħobb lil persuna oħra, irrid jibda billi jsir jaf lil din il-persuna, u iktar ma wieħed jinsa lilu nnifsu, iktar ikun jirnexxielu jħobb. Jekk nagħtu ħarsa lejn il-vokazzjonijiet, nindunaw li kull vokazzjoni hija msejsa fuq dawn iż-żewġ elementi prinċipali: l-imħabba, u l-għotja tagħhom infushom. Kemm fil-vokazzjoni taż-żwieġ, kif ukoll tas-saċerdoti, sorijiet jew lajċi mpenjati, ilkoll irid ikollhom l-imħabba u l-għotja tagħhom infushom fil-fond ta’ qalbhom.

Qawl taljan jgħid: ‘non ce rosa, senza spine’. Bħal ma warda sabiħa tista tniggeż bix-xewk tagħha, hekk ukoll l-imħabba. L-imħabba hija ferm sabiħa, imma taf tweġġa’ meta tagħraf tħobb mingħajr ma tistenna xejn lura. Madre Tereża kienet tgħid: ‘Love until it hurts’, u lkoll nafu kemm din tinvolvi sagrifiċċji kbar! Fiż-żwieġ, kemm-il darba l-ġenituri ikollhom jiċċaħdu minn affarijiet biex jaraw lil uliedhom aħjar, u l-akbar għafsa ta’ qalb tal-ġenituri tkun meta uliedhom ma japprezzawx dak li għamlu għalihom, u saħansitra jabbandunawhom jew iduru kontrihom. L-istess jiġri mas-saċerdot, li jkun offra ħajtu biex iwassal lil Kristu għand l-oħrajn, u minħabba li jkun dagħjjef, ta’ bniedem bħal oħrajn li hu, xi nies iduru kontrih u kontra l-Knisja.

Kieku kellha ssir lista’ ta’ nies li weġġgħu, jew qed iweġġgħu minħabba li l-imħabba li juru, din zgur ma tispiċċa qatt. Taf tkun faċli li nies bħal dawn jinterpretaw l-imħabba b’mod ikrah u negattiv, minħabba n-nuqqas ta’ mħabba vera u sinċiera li kellhom f’ħajjiethom. Pero San Pawl jagħmlilna kuraġġ, fl-ittra tiegħu lil Korintin, meta jgħid: ‘M’hemmx imħabba aqwa minn din li wieħed jagħti ħajtu għal ħbiebu! L-imħabba taf tistabar u tħenn, l-imħabba m’hijiex għajjura, ma tintefaħx biha nnifisha, ma titkabbarx fuq l-oħrajn, ma tixtieqx dak li mhux xieraq, ma tfittixx dak li hu tagħha, xejn ma tinkorla, ma żżommx f’qalbha għad-deni, ma tifraħx bl-inġustizzja imma tifraħ bil-verità, kollox tagħder, kollox temmen, kollox tittama, kollox tissaporti, l-imħabba ma tintemm qatt.’ (1 Kor 13:8)

Jekk ilkoll nimxu fuq dawn l-kwalitajiet ta’ l-imħabba, żgur li l-imħabba vera tikber fostna!

Il-Maħfra

Meta xi ħadd iweġġagħek b’xi azzjoni ħażina li jkun għamel, żgur li l-maħfra ma tkunx waħda mill-ewwel affarijiet li tiġik f'rasek li tagħmel! Ovvjament, il-gravità ta' kemm wieħed ħa jħossu mweġġa jiddependi fuq l-azzjoni li jkun irċieva, pero l-proċess tal-maħfra idum skond meta dak li jkun jiddeċiedi li jħalli l-weġgħa warajh u allura jasal li jaħfer.

Hija fin-natura tal-bniedem li wieħed ipatti lura għal azzjoni ħażina li jkun irċieva. Forsi jekk wieħed ipatti lill-avversarju tiegħu, ma jkunx qed jaħli l-enerġija tiegħu, jaħseb fuq modi kif jista' jagħmel dan? U wara dan kollu, flok ma wieħed ikun strieħ minn dik il-weġgħa, ikun kabbar iktar il-mibgħeda u allura jibqa' ma jistriehx.

Il-maħfra tasal għaliha biss jekk tħares lejn Kristu Msallab u titgħallem minnu. Titgħallem kemm hi kbira l-imħabba t'Alla li biex jaħfrilna dnubietna u jaqqgħadna mal-Missier, ma stmerrx jibgħat lill Ibnu l-Waħdieni fid-dinja, minkejja d-drabi kollha li aħna ċħadnieh. Ġesù kemm il-darba tkellem fuq din il-maħfra, pero mhux tkellem biss, imma ipprattikha ukoll. Saħansietra meta kien fuq is-salib, f'dik is-sura ta' tbatija, talab lil Missier biex jaħfrilhom u mhux biss, imma skużhom billi qal: "Missier aħfrilhom, għax ma jafux x'inhuma jagħmlu" (Lq 23:34). Minjaf kemm drabi ma konniex nafu x'aħna nagħmlu! Minkejja dan, Ġesù jaħfrilna u jiskużana, kull darba li nersqu lejH fis-Sagrament tar-Rikonċiljazzjoni.

Faċli ngħidu li hi impossibli li taħfer, u nieqfu fuq li Ġesù huwa Alla u jien bniedem dgħajjef li ma nasalx biex naħfer. Imma mhuwiex minnu li jien ma nistax nasal li naħfer. L-importanti li nagħmel ħilti kollha, u sinċerament inkun irrid li naħfer, u Alla ma jonqosx milli jagħtini l-għajnuna meħtieġa u l-grazzja tiegħu biex nasal għal din il-maħfra. Niftakru li Alla jafna, u jaċċettana bid-djugħfija tagħna, u zgur ma jitlobx l-impossibli minna.

Faċli naħsbu li meta wieħed jasal li jaħfer, tkun qed tagwadanja biss il-persuna l-oħra. Fil-verità, l-persuna li taħfer taggwadanja ħafna ukoll, għax dik l-istess rabja u mibegħda tinbidel f'ferħ u paċi tal-qalb. Il-maħfra ma tapplikax biss meta niġu biex naħfru lil-oħrajn, imma importanti huwa ukoll li nkunu kapaċi naħfru lilna nfusna ukoll. Il-maħfra m'għandiex limiti, infatti meta Pietru staqsa lil Ġesù xi kemm il-darba wieħed għandu jaħfer, Ġesù wieġeb: "Ma ngħidlekx għal seba' darbiet, imma sa sebgħin għal seba' darbiet" (Mt 18:22).

Mela nagħmlu l-qalb u nersqu lejn is-Sagrament tar-Rikonċiljazjoni biex nirċievu l-maħfra mingħand Alla u biex nirċievu ukoll il-grazzja tiegħu ħalli bħal Ġesù nkunu kapaċi naħfru lilna nfusna u lil oħrajn!

Il-Fidi

Il-fidi… kelma tqila biex tifhimha għax hi twemmin ibbażat fuq ir-raġuni, imma ma tistax taraha jew tippruvaha bix-xjenza. Forsi ħafna jorbtu l-fidi mar-reliġjon, imma fil-verità tista tgħid li niġu bżonnha kuljum.

It-tfal ma joqogħdux jiċċekkjaw jekk fil-lunch li jkunu preparawlhom il-ġenituri għall-iskola, ikunux għamlulhom xi velenu, għax huma ċerti mill-imħabba tagħhom tant li għandhom fiduċja għamja li mhux ħa jtuhom affarijiet li jagħmlulhom il-ħsara. Jekk mill-banda l-oħra qatt ma jkunu irċevew imħabba mill-ġenituri jew issir xi azzjoni li kaġun tagħha jitilfu il-fiduċja fil-genituri taghhom, allura jiddubitaw kollox, u jħossu ċerta indifferenza u bruda minħabba din in-nuqqas ta’ mħabba.

Dan il-paragun hu simili tal-fidi tagħna f’Alla. Hawn min għandu fidi kbira f’Alla għax f’ħajtu kellu xi esperjenzi li kabbru fih żerriegħa ta’ fidi. Issib ukoll min ikun mgħammed u jkollu żerriegħa ta’ fidi, iżda ma tkunx intgħaġnet ma l-iżvilupp ta’ l-individwu. B’riżultat ta’ dan, il-bniedem irrid ikabbar fih il-fidi, biex b’hekk ikun jista jagħraf lil Alla.

Aħna l-insara rridu nkun nsara vera u mhux insara fejn jaqblilna biss! Inutli ngħidu li nemmnu f’Alla imbagħad nagħmlu distinzjoni bejn razza, reliġjon u kull tip ta’ diskriminazzjoni oħra. Il-qassisin, b’mod paritkulari, għandhom responsabilta’ kbira biex kollha kemm huma jilqgħu lil kulħadd. B’hekk tittneħħa din il-perspettiva ħażina li sfortunatament hawn tal-Knisja. Mhu veru xejn li l-Knisja hija partit politiku ieħor, kif jinstema’ jingħad fil-media. Il-Knisja waqqafha Sidna Ġesù Kristu bħala komunità li flimkien f’għaqda waħda tistqarr fidi waħda. Mela kif jista’ jkun li jiġu xi nsara u jgħidu li ma Alla iva, u mal-Knisja le?! Nammettu li fil-knisja saru u jsiru żbalji li ħabba fihom batew nies innoċenti u dan huwa ħażin u ta’ ħsara kbira, pero ma rridux ninsew li l-knisja hija mmexxija minn bnedmin u għalhekk hija suġġetta għall-izbalji. Xorta jibqa l-fatt li Ġesù ħalla f’idejn l-appostli biex imexxu l-knisja, u kien jaf x’isarfu, imma b’dan wera li fid-dinja ħadd u xejn mhu perfett, u li hu kapaċi jinqeda bid-dgħjufija tagħna l-bnedmin, biex iwettaq ir-rieda tiegħu.

Niftakru, li jekk aħna nsara ta’ veru, rridu nimxu dejjem wara Kristu, u għandna d-dmir li ngħaddu dan id-don tal-fidi lil kulħadd, hekk kif ġiet mgħoddija lilna minn Missierna San Pawl.

Wara li Jgħaddi Kollox

Il-bambini jerġgħu jidħlu lura f’posthom, is-siġra tal-milied tiżżarma u kollox jerġa’ lura għan-normal. Kulħadd jerġa’ jibda r-rutina tas-soltu, it-tfal lura fuq il-bankijiet ta' l-iskola u l-kbar fuq il-postijiet tax-xogħol.

Terġa tibda toħnoqna l-konfużjoni u l-ġenn tal-ħajja li tħallina bla nifs! Sakemm ma kienx hawn min ħadem u ġġennen iktar fil-milied, li naħseb kien hawn numru mhux ħażin! Imma f’dan l-artiklu nixtieq nerġa nagħmel ‘rewind’ u niffoka ftit fuq x’ħadna minn din it-tifkira tant kbira u sabieħa tat-twelid ta’ Sidna Ġesù Kristu. Xi ftit jew wisq kulħadd kellu ftit ħin liberu fejn seta’ jidħol fl-atmosfera tal-Milied. Meta ngħid tidħol fl-atmosfera miniex nirreferi għall-affarijiet artifiċjali bħal parties u ikliet li huma sinonimi maż-żmien tal-Milied.

Ta’ kull sena nagħmlu t-tifkira ta’ ġrajja li ġrat ftit aktar minn elfejn sena ilu meta f’daqsxejn ta’ għar f’Betlehem twieldet tarbija li kellha tkun id-dawl ta’ kull bniedem. Aħna ma nfakkrux tifkira li ġrat darba u daqshekk imma li għadha u tibqa’ isseħħ sa l-aħħar tad-dinja! Dan għaliex Ġesù twieled għal kull bniedem kemm għal ġenerazzjonijiet ta’ qabilna kif ukoll għal dawk li għadhom ġejjin. Kull Milied mhux bħal ta’ qablu, kull Milied għandu messaġġ differenti xi jwasslina. Il-Milied irid iħalli effett fuqna matul is-sena kollha, inkella l-Milied seta’ ma ġie xejn!

Il-veru Milied ifisser imħabba bla qies minn Alla li ġie fid-dinja u sar bniedem biex jifdi lili u lilek! Mela issa din l-imħabba trid timxi minn bniedem għall-ieħor bħan-nixxiegħa ilma u tasal sa truf l-art kollha! Jekk matul din is-sena kulħadd jipprova jwassal din l-imħabba lil dawk ta’ madawru, jkun verament qed jgħix il-Milied is-sena kollha!

Awguri għal sena mimlija ferħ, paċi tal-qalb, saħħa u fuq kollox li ngħixu l-Milied is-sena kollha!
B'hekk ikun Milied li fih Ġesù Bambin twieled f'qalba, u kompla jgħix magħna tul ħajjietna kollha.

Din is-Sena, Fejn Ħa Jitwieled Ġesù Bambin?

Bambin... iswed, abjad jew samrani? Ġesù kien Lhudi, allura aktarx li kellu karnaġġjon samrani, jixbah lil dak tagħna l-Maltin. Interesanti kif il-Bibbja ma tagħtix wisq importanza tad-dehra ta’ Ġesu’. Dan biex turi biċ-ċar li Ġesù ġie biex isalva lil kulħadd u biex kulħadd jinduna li d-dehra ta’ barra mhix kollox!
‘Do they know it’s Christmas time?' Din hija diska li tindaqq ħafna tul dawn iż-żminijiet u li naħseb għandha kliem sinifikanti ħafna. Kemm hawn nies li l-milied għalihom huwa ġurnata bħall-oħrajn, kollha vjolenza, inġustizzja u kull xorta ta’ tbatija oħra! Fejn hu Ġesu’ bambin fit-taqlib li hemm fl-Art Imqaddsa, post li ftit aktar minn elfejn sena ilu twieled Ġesù?
L-Afrika… In-nies imutu bħal għasfar tal-bejt b'marda qerrieda ta’ l-A.I.D.S, bil-ġuħ u bil-faqar. Il-milied iqattgħuh jaħdmu fis-sħana tax-xemx tiżreġ, biex forsi jkollhom x’jieklu għal dik il-lejla! X’milied għalihom!
Inħarsu lejn l-Awstralja... Hawn kieku issib ikel bir-rimi, imma għandhom tip ta' mewta oħra, dik ta’ ruħhom! Xalar u divertiment sfrenat, għawm u ‘sunbathing’. Dan hu l-milied għalihom. Tgħid hawnhekk hu l-post adattat fejn jitwieled Ġesu’ bambin?
U aħna l-Ewropej... Erħielna nżejnu d-djar u l-istabbilmenti aktar minn xahar qabel u ngħidu li ħa jitwieled fostna! Fuq skala iżgħar, ejjew naraw ftit x’jiġri f’pajjiżna, li fuq kollox nagħmlu parti mill-ewropa ukoll! Aħna 'l-Maltin minn dejjem kellna valuri msejsa fuq fidi soda, iżda sfortunatament qed nittieħdu mill-bqija ta’ l-ewropa! Għal grazzja t'Alla, Malta la għandna gwerrer u ħafna minna għandna saqaf fuq rasna u ngħixu komdi. B’danakollu ma nistgħux inkunu kuntenti billi nagħmlu l-bambini fit-twieqi biss! Jekk minagħalina li l-Milied hu dan, qejrin żballjati!
Irridu niftħu għajnejna biex naraw id-dmugħ sħun iċarar fuq ħaddejn omm, li tilfet lil binha f’dawn il-jiem, ta’ l-armla li qed trabbi lil uliedha waħedha. Nisimgħu il-karba tal-marid fl-isparijiet, u ħafna nies li qed jgħixu tbatija waħedhom fis-silenzju. Tbissima fuq fommna taf tbiddel ħajja ta' xi anzjan abbandunat minn familtu. Mela mmiddu idejna u nibdew naħdmu u ngħinu lil kulħadd. B’hekk Ġesù bambin ma jibqax f’dik l-istalla kiesħa ta’ Betlehem imma jitwieled fis-sħana tal-qalb ta’ kull bniedem!

Il-Ġid Materjali, Kif Iwassal Għal Ġid Spiritwali?

Computers, mobiles, ħwejjeġ… Qatt ħsibt li dawn l-affarijiet kollha għad jispiċċaw, bżonjużi kemm huma bżonnjużi, u importanti f'ħajjitna? Forsi ħafna jgħidu, kif nistgħu ngħaddu mingħajrhom. Dan huwa veru, għax illum l-materjaliżmu u t-teknoloġija daħlu f’kollox u kullimkien!

Allura wieħed jistaqsi, kif nistgħu nimxu fuq l-Evanġelju u ma norbtux qalbna mal-ġid ta’ l-art meta qiegħdin f’dinja fejn il-materjaliżmu jirrenja! Alla għamilna fuq il-ħolqien kollu biex nieħdu ħsiebu u nużaw moħħna biex naħdmu tajjeb l-art u l-ġid kollu li tana għal ġid tagħna u tal-proxxmu tagħna kollu. X’ġara tul dawn l-aħħar ħamsin sena?... Saru ħafna skoperti u avvanzi li sfortunatament issa qed iħallu impatt ħażin fuq l-umanita’ kollha!

Wieħed mill-efetti ħżiena hu dak li sirna soċjeta’ sekulari, voldieri l-mezzi tal-miedia u t-teknoloġija qed jinfluwenzawna tant li qed jiklulna l-valuri li trawwimna fihom matul iż-żmien. Huwa tajjeb li nużaw it-teknoloġija u affarijiet oħra li jistgħu jgħinuna nimxu 'il quddiem f’din il-ħajja, imma rridu noqogħdu attenti li ma nitilfux l-eternita’ ħabba f’ hekk! Ħafna drabi niġu ilsiera tal-ġid tagħna stess għax jibda jikmandana u jsir prijorita’ għalina bla ma nindunaw!

Biex npoġġi dan li qed ngħid fil-prattika ħa nġib ftit sitwazzjonijiet mll-ħajja ta’ kuljum fejn qed iseħħ dan. Ħafna kopji li jkunu qed jaħsbu biex jibdew familja jaħdmu mis-sbieħ il-jum sad-dlama tal-lejl sabiex ilaħħqu ma l-ispejjez tat-tieġ u tad-dar….. Id-dar tlestiet, il-koppja żżewġet imma wara lanqas sena qiegħdin fil-kawża għas-seperazjoni! Fil-maġġoranza tal-kasi jiġri li tkun inagħtat ħafna importanza lil affarijiet esterni bħad-dar, tieġ etc…. u l-affarijiet l-iktar importanti u interurji bħar-relazzjoni bejn il-kopja kif ukoll r-relazzjoni m’Alla, jkunu tkissru totalment. Jew inkella kemm hawn min ħadem u stinka imbgħad telaq f’qasir il-għomor u ħalla kollox warajh!

Jekk nagħtu ħarsa lejn iċ-ċimiterji nindunaw li l-ħajja ta’ din l-art tgħaddi bħal ħolma. Moħħna jrid jaħseb dejjem kif ħa jinqeda sewwa bil-ġid li jgħaddi biex nakwistaw il-ħajja ta’ dejjem. Fl-aħħar mill-aħħar Alla mhux ha jistaqsina kemm kellna affarijiet imma kemm għinna lil-proxxmu bl-affarijiet li kellna!